Ապրիլի 26-28-ը Հաշվեքննիչ պալատը հյուրընկալել էր ԵՄ/ՏՀԶԿ ՍԻԳՄԱ ծրագրի ներկայացուցիչներին՝ հանրային ֆինանսների կառավարման ծրագրի ավագ խորհրդատու Ալասթեր Սվարբրիքին և հանրային ֆինանսների կառավարման խորհրդատու Յուպ Վրոլիկին։ 

Հյուրերը հանդիպումներ են ունեցել Հաշվեքննիչ պալատի նախագահի և անդամների, ԱԺ հանձնաժողովների ներկայացուցիչների՝ ֆինանսավարկային և բյուջետային հարցերի մշտական հանձնաժողովի նախագահ Գևորգ Պապոյանի գլխավորությամբ, Ֆինանսների նախարարի և այլ կառույցների ներկայացուցիչների հետ։

Պալատի նախագահ Ատոմ Ջանջուղազյանը, ողջունելով հյուրերին և բարձր գնահատելով նախկինում կատարված համատեղ աշխատանքը, նշեց, որ Պալատի ինստիտուցիոնալ կարողությունների հետագա զարգացման ճանապարհով վերջինիս գործունեության բարելավումն անվերապահ առաջնահերթություն է։

Ալասթեր Սվարգրիքը հանդես եկավ ողջույնի խոսքով և անդրադառնալով ԵՄ/ՏՀԶԿ ՍԻԳՄԱ ծրագրի և Հաշվեքննիչ պալատի միջև երկարաժամկետ համագործակցությանը, վերահաստատեց այդ հարաբերությունները շարունակելու և զարգացնելու հարցում իրենց ներդրումն ունենալու պատրաստակամությունը։

Անդրադարձ կատարելով այցի նպատակներին, Ծրագրի ավագ խորհրդատուն նշեց քննարկումների հիմնական ուղղությունները․

1․ Հաշվեքննիչ պալատի մասին Հայաստանի Հանրապետության օրենքը, առաջարկվող օրենսդրական փոփոխությունները

2․ Հաշվեքննիչ պալատի հաղորդակցության ռազմավարության կառուցվածքն ու հնարավոր տարրերը։

Կողմերը քննարկեցին ՀՊ օրենքում առանցքային դրույթներում առկա խնդիրները և դրանց հնարավոր լուծումները։

Քննարկվեցին նաև ՀՊ հաղորդակցության ոլորտում զարգացման ակնհայտ խոչընդոտները, որոնց կանխարգելումը մեծ առաջընթաց կապահովի Հաշվեքննիչ պալատի թե՛ ներքին, և թե՛ արտաքին հաղորդակցության հարցում։

Քննարկման մասնակիցները հանդիպման ավարտին արձանագրեցին, որ Հաշվեքննիչ պալատի համար այս կարևոր ժամանակաշրջանում էական ազդեցություն ունեն թե՛ օրենսդրական փոփոխությունները, և թե՛ հաղորդակցության ռազմավարությունը։ Բարեփոխումների արդյունքում այդ երկու փաստաթղթերի ճիշտ կիրառումը կարող է հանդիսանալ զարգացման լոկոմոտիվի լրջագույն ազդակ։

Բովանդակալից և հագեցած քննարկումներ կայացան նաև օրակարգի երկրորդ օրը։ ՀՊ երկրորդ մասնաշենքում ԵՄ/ՏՀԶԿ ՍԻԳՄԱ ծրագրի ներկայացուցիչներին ընդունեցին ՀՊ անդամներից Աբրամ Բախչագուլյանը, Արմեն Գևորգյանը և Եղիշե Սողոմոնյանը։ Հանդիպման ձևաչափը ենթադրում էր քննարկումներ ՀՊ օրենքի և հաղորդակցության ռազմավարության վերաբերյալ, մտքերի փոխանակում և հետագա քայլերի մշակում։

Պալատի անդամները ներկայացրեցին ՀՊ ձեռքբերումներն այդ երկու ուղղություններով և իրենց տեսլականները ներկայացնելով՝ խոսեցին նաև օրակարգով սահմանված ոլորտների զարգացման, իրենց պատկերացրած, հնարավոր ճանապարհների մասին։

Հաշվեքննիչ պալատը, լավագույն արդյունք ունենալու նպատակով, օրակարգով նախատեսել էր հանդիպումներ ՀՊ բոլոր թիրախային լսարանների ներկայացուցիչների և շահագրգիռ կողմերի հետ։ Ծրագրի ներկայացուցիչները հանդիպեցին նաև լրագրողներին՝ որպես ՀՊ արտաքին հաղորդակցության թիրախային լսարան։

Միջոցառման վերջին օրը, ամփոփելով հանդիպումների արդյունքները, կողմերը պայմանավորվեցին նախանշված ժամկետներում քննարկել և ավարտին հասցնել Ծրագրի ներկայացուցիչների կողմից առաջարկվող աշխատանքային նախագծերը։