ՀԱՇՎԵՔՆՆԻՉ ՊԱԼԱՏԻ ՄԻՋԱԶԳԱՅԻՆ ՀԱՄԱԳՈՐԾԱԿՑՈՒԹՅԱՆ ՇՐՋԱՆԱԿԸ

Հաշվեքննիչ պալատն անդամակցում է հաշվեքննություն (արտաքին պետական աուդիտ) իրականացնող բարձրագույն մարմինների միջազգային, եվրոպական և ասիական կազմակերպություններին՝ INTOSAI, EUROSAI, ASOSAI:

ՀՀ հաշվեքննիչ պալատը INTOSAI, EUROSAI, ASOSAI շրջանակներում սերտորեն համագործակցում է բազմաթիվ երկրների աուդիտի բարձրագույն մարմինների հետ: Հաշվեքննիչ պալատի հիմնադրումից ի վեր երկկողմ համագործակցության հուշագրեր են կնքվել Ռուսաստանի Դաշնության, Չինաստանի Ժողովրդական Հանրապետության, Գերմանիայի Դաշնային Հանրապետության, Նիդերլանդների Թագավորության, Ֆրանսիայի, Արաբական Միացյալ Էմիրությունների, Վրաստանի, Բելառուսի, Լեհաստանի, Լատվիայի, Բուլղարիայի, Մոլդովայի և մի շարք այլ երկրների բարձրագույն աուդիտի (հաշվեքննիչ) մարմինների հետ:  2019 թվականին համագործակցության համատեղ ծրագիր է նախաձեռնվել նաև Շվեդիայի բարձրագույն աուդիտի մարմնի հետ:

2018 թվականից սկսած Հաշվեքննիչ պալատի և Ամերիկայի Միացյալ Նահանգների բարձրագույն հաշվեքննիչ մարմնի (GAO) միջև նախաձեռնվել է երկկողմ համագործակցության շրջանակ՝ ԱՄՆ միջազգային զարգացման գործակալության (USAID) տեխնիկական աջակցությամբ: 2020 թվականին մեկնարկել է Հաշվեքննիչ պալատի տեխնիկական աջակցության եռամյա ծրագիրը՝ ԱՄՆ GAO-ի և USAID-ի համատեղ հանձնառությամբ:

Հաշվեքննիչ պալատը սերտ համագործակցում է այնպիսի միջազգային կազմակերպությունների հետ, ինչպիսիք են՝ Համաշխարհային բանկը (World Bank), Եվրոպական միության պատվիրակությունը ՀՀ-ում, Գերմանիայի միջազգային համագործակցության ընկերությունը (GIZ), USAID-ն, ԵՄ/ՏԶՀԿ համատեղ SIGMA ծրագիրը, Միացյալ ազգերի կազմակերպության զարգացման ծրագիրը՝ UNDP:

ՄԱՍՆԱԿՑՈՒԹՅՈՒՆԸ ՄԻՋԱԶԳԱՅԻՆ ՄԱՍՆԱԳԻՏԱԿԱՆ ՀԱՐԹԱԿՆԵՐԻՆ

Համագործակցություն INTOSAI հետ

INTOSAI-ն աուդիտի բարձրագույն մարմինների անկախ միջազգային կազմակերպություն է: Ստեղծվել է 1953թ. և մասնագիտական հարթակ է հանդիսանում՝ հանրային հատվածի հաշվեքննության ոլորտի ամրապնդման, աուդիտի բարձրագույն մարմինների պրոֆեսիոնալության զարգացման, ինչպես նաև գիտելիքների և լավագույն պրակտիկայի փոխանակման համար: Կազմակերպությունը հատուկ խորհրդատվական կարգավիճակ ունի ՄԱԿ-ի տնտեսական և սոցիալական խորհրդում: INTOSAI համընդհանուր նպատակների իրագործման համար ստեղծվել են բարձրագույն հաշվեքննիչ մարմինների տարածաշրջանային կազմակերպություններ: Կազմակերպությունը միասնական նպատակների իրականացման համար կյանքի է կոչել մասնագիտական հանձնաժողովներ, աշխատանքային մասնագիտական խմբեր, որոնք կազմակերպում են կանոնավոր հանդիպումներ և այլ տեղեկատվական միջոցառումներ:

Երեք տարին մեկ անգամ անցակացվում է աուդիտի բարձրագույն մարմինների միջազգային կազմակերպության համագումար` INCOSAI: 

INTOSAI կազմակերպությունը միավորում է աշխարհի 195 բարձրագույն հաշվեքննիչ մարմիններ, 5 բարձրագույն հաշվեքննիչ մարմիներ՝ դիտորդի կարգավիճակով, և մեկ բարձրագույն հաշվեքննիչ մարմին՝ փոխկապակցվածի կարգավիճակով: ՀՀ հաշվեքննիչ պալատն (նախկինում՝ Վերահսկիչ պալատ) անդամակցում է կազմակերպությանը 1998 թվականից:

Մասնագիտական աջակցության և խորհրդատվության նպատակներով Հաշվեքննիչ պալատը հաճախակի է համագործակցում INTOSAI-ի կողմից  զարգացման նախաձեռնության (IDI) հետ:

Որպես աուդիտի բարձրագույն մարմինների միջազգային ընտանիքի անդամ Հաշվեքննիչ պալատի համար առաջնային են INTOSAI կողմից հավանության արժանացած աուդիտի բարձրագույն մարմինների միջազգային ստանդարտները (ISSAI-ները).

⇒Լիմայի հռչակագիր (1977թ.) - ISSAI-P 1

⇒Մեխիկոյի հռչակագիր (2007թ.) - ISSAI-P 10

 ⇒Աուդիտի բարձրագույն մարմինների միջազգային մյուս ստանդարտները (տես՝ ստանդարտներ բաժնում):

Հաշվեքննիչ  պալատն անդամակցում է`  

⇒INTOSAI–ի բնապահպանական աուդիտի աշխատանքային խմբին,

⇒INTOSAI–ի կայուն զարգացման նպատակների և  կայուն զարգացման առանցքային ցուցանիշների (ազգային առանցքային ցուցանիշների) աշխատանքային խմբին,

⇒INTOSAI–ի պետական գնումների աուդիտի աշխատանքային խմբին:

Համագործակցություն EUROSAI հետ

EUROSAI–ն հանդիսանում է INTOSAI–ի տարածաշրջանային կազմակերպություն, որը ստեղծվել է 1990թ. և որի անդամների թիվը 50-ն է՝ Եվրոպական երկրների 49 աուդիտի բարձրագույն մարմիններ և Եվրոպական աուդիտորական պալատը: Հաշվեքննիչ պալատն անդամակցում է EUROSAI–ն 2000 թվականից: Կազմակերպության հիմնական նպատակներն են նպաստել Եվրոպայի բարձրագույն հաշվեքննիչ մարմինների միջև պրոֆեսիոնալ համագործակցությանը, աջակցել տեղեկատվության և մեթոդական նյութերի փոխանակմանը, նպաստել հանրային հատվածի հաշվետվողականությանը, խթանել այս բնագավառում ակադեմիական բազայի ստեղծմանը և հաշվեքննության տերմինաբանության ձեռքբերմանը:

 Հաշվեքննիչ  պալատն անդամակցում է`

⇒EUROSAI–ի  բնապահպանական աուդիտի աշխատանքային խմբին,

⇒EUROSAI–ի ճգնաժամների վերացմանն ուղղված օգնության աուդիտի աշխատանքային խմբին,

⇒EUROSAI-ի տեղեկատվական տեխնոլոգիաների աշխատանքային խմբին:

Համագործակցություն ASOSAI հետ

ASOSAI-ն INTOSAI–ի տարածաշրջանային կազմակերպություն Է, որը ստեղծվել է 1979թ. և միավորում է 45 աուդիտի բարձրագույն մարմիններ: Կազմակերպությունն իր գործունեության կարևորագույն մասն է համարում ուսուցողական ծրագրերը, փորձի փոխանակումը, կադրերի վերապատրաստումը, ինչպես նաև աուդիտի որակի ու կատարողականի բարելավումը: Ասիական տարածաշրջանի հաշվեքննության գերագույն ատյանները միավորող այս կազմակերպությանը Հաշվեքննիչ պալատն անդամակցում է 2007 թ.-ից:

ԵԱՏՄ անդամ երկրների աուդիտի բարձրագույն մարմինների հետ համատեղ աուդիտներ

ԵԱՏՄ անդամ երկրների (Հայաստան, ՌԴ, Բելառուս, Ղազախստան, Ղրղզստան) աուդիտի բարձրագույն մարմինների միջև համագործակցությունն էլ ավելի է խորացել համատեղ աուդիտների շնորհիվ: Համատեղ աուդիտները դյուրին են դարձրել տեղեկատվության և գիտելիքների փոխանակումը, կարողությունների զարգացումը և լավագույն փորձի բացահայտումը:

Հաշվեքննիչ պալատի պատվիրակությունը յուրաքանչյուր տարի մասնակցում է «Եվրասիական տնտեսական միության մասին» համաձայնագրով նախատեսված ԵԱՏՄ անդամ պետությունների բարձրագույն հաշվեքննիչ մարմինների կողմից իրականացվող թվով երկու համատեղ աուդիտի միջոցառումներին հետևյալ թեմաներով՝

⇒ԵԱՏՄ անդամ պետությունների ներմուծման մաքսատուրքերի (համարժեք այլ տուրքերի, հարկերի և հավաքագրումների) գումարների հաշվեգրում և բաշխում, դրանք որպես եկամուտ, Եվրասիական տնտեսական միության անդամ պետությունների բյուջեներ փոխանցում

⇒ԵԱՏՄ բյուջեի միջոցների ձևավորում, կառավարում ու տնօրինում, Եվրասիական տնտեսական միության գույքի և այլ ակտիվների օգտագործում:

ԵԱՏՄ շրջանակում համատեղ աուդիտները կրում են շարունակական բնույթ:

Համագործակցություն ԱՊՀ անդամ պետությունների աուդիտի բարձրագույն մարմինների հետ

ԱՊՀ անդամ պետությունների աուդիտի բարձրագույն մարմնի հետ հարաբերությունները իրականացվում են ԱՊՀ անդամ պետությունների հաշվեքննիչ մարմինների ղեկավարների խորհրդի շրջանակներում, որին պալատն անդամակցում է դեռևս 2000թ-ից:

Հաշվեքննիչ պալատը համագործակցության համաձայնագրեր է կնքել Ռուսաստանի Դաշնության, Ուկրաինայի, Բելառուսի Հանրապետության բարձրագույն հաշվեքննիչ մարմինների հետ: ՌԴ Հաշվիչ պալատի հետ անցկացվում են համատեղ ստուգումներ, որոնք, ըստ պայմանավորվածության, պարբերական բնույթ են կրում: ԱՊՀ անդամ պետությունների աուդիտի բարձրագույն մարմինների ղեկավարների խորհրդի նիստը տեղի է ունենում յուրաքանչյուր տարի: Տարվա ընթացքում կազմակերպվում են նաև խորհրդին կից մասնագիտական խմբերի նիստեր: